امتلأت الصحف والأسافير بأسماء و ( صور) تشكيلة حكومة ولاية الخرطوم الجديدة ، وقد لفت نظر العبد لله أن من تم اختيارهم لهذا الأمر (فرحون) بتحمل المسؤولية على عكس التابعين الذين كانوا يهربون منها ويتخوفون من تسنمها ، وأن علامات السرور قد علت وجوههم بل أن بعض أهاليهم قد قاموا بذبح الذبائح وتبادل التهاني ، العبد لله طفق يبحث عن سر هذا السرور فوجد الحاجات التحت دي !
• ح يكون عندو حاشية وهيلمانة ... عندو مكتب ومدير مكتب وسكرتيرة وعربية تودي الأولاد المدارس و(بوكس) يجيب الخضار من السوق وعربية تاني تودي المدام الكوافير والأعراس و(الحنانة) ده غير (البرادو) بتاعت سعادتو
• ح يرتاح من قصة كل دقيقة يمشي يعاين للجمرة ويشوف الفضل فيها كام وهل ح تقضي ولا ح تقوم تقطع نص الليل وتجهجه باكاتو .
• أهم حاجة في الموضوع ح يرتاح من (حكايت) يوم خمسة دي وهو اليوم الذي ينتهي فيهو مصروف البيت ويبدأ في عمليات الإستلاف و (الجرورة) وح تختفي من حياتو عبارات مثل (بالله ألاقي عندك سلفة) .. (هسه الشهر ده يتموهو كيف؟) لأنو مخصصاتو الشهرية مع (البدلات) و (السفريات) والشنو ما بعرف ح تكون كفيلة بأنها تقعدو مليون شهر تاني .
• وح تتاح ليهو فرصة يسافر .. طبعا قبلما يكون مسؤول (التذكرة بس كانت بتجهجهو) .. لاااا هسه الوضع ح يختلف .. كل يومين تلاته شنطتو والمطار ..طبعا قبل ما يكون وزير كان بيتبهدل في التفتيش تطلع الحزام الجهاز يقول ليك تيت تيت .. يقوم يطلع النضارة وبرضو الجهاز يقول ليك تيت تيت .. يقوم تطلع الما عارف شنو داك ... الكلام ده تاني مش ح يحصل بس يسلم جوازو قبل السفرية لبتوعين العلاقات العامة وورقو وتأشيرتو وتذكرتك كووولها تكون جاهزة ومن صالة كبار الزوار وعلي الطيارة طوااالي
• الأكل بتاع سعادتو أكيد ح يتغير .. معقولة ح يفطر تاني (بوش) ويتغدى (عدس) ويتعشى (فول)؟ .. الحاجات دي بياكلا (الشعب) ، تاني ح ياكل حاجات تانيه خالص .. حاجات طازجة ودسمة وطرية حاجات ذات سعرات حرارية مرتفعة وقيمة غذائية عالية ومش كده وبس ..القصة ح تكون فيها تحلية ؟ يعني بعد ما يتتغدي ح تجيهو صينية فيها (فواكه مشكلة) وممكن كمان (حلويات) ويااا حليل الموز !
• سعادتو تاني مش ح يمشي (الجزارة) كل يوم جمعة عشان يشتري (نص الكيلو) البقري المجلفط .. لا تاني ح ياكل (بتلو) و(فلتو) و(عجالي لبن) ويوم الجمعة ده بالذات (الخروف) ح يكون الصباح معلق في باب الشارع !
• وح يمشي (الحج) بدون ما يدفع مليم واااحد .. ويجيب معاهو هدايا و(جلاكسيهات) للعيال وأمهم كمان .
• ما ح يكون عندو علاقة برسوم الجامعات والمدارس والأقساط و (فلقة الدماغ) ومافيش تاني واحد من الأولاد ح يطردوهو عشان ما (دفع الرسوم) وأكيد الأولاد مش ح يتعلمو تاني في المدارس الحكومية .. مدارس أجنبية وبس !
• ح تنطلق وراء عربته (المظللة) عدد من عربات الحراسة والتأمين و(موتر) يفسح له الطريق ويييو ويييو ويييو !
• ما ح يكون في أسرتو أي زول (طائر) وما لاقي وظيفة .. كل العاطلين ح يشتغلو ... القصة كوولها كارت من سعادتو و (حامله يهمني أمره)
• ما ح يشيل هم للعلاج لأنو تاني مش ح يمشي لمستشفى حكومي يقول ليهو جيب القطن والشاش واللصقات وصبغة يود والحقن الفاضية والحقن المليانة ..لا !!الحاجات دي للمواطنين أما سعادتو فلو شعر بأي حاجة (ألمانيا) طوااالي !
كسرة :
وأنا أقول (بيفرحوا ليه) ؟
• كسرة ثابتة (قديمة) :
• - أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و
التغيير
ليست هناك تعليقات:
إرسال تعليق