على صفحتها بفيسبوك نشرت الدكتورة سارة النور منذ ساعة من الآن التدوينة التالية:
في كافتريا مستشفى أم درمان..
حر شدييد.. يزيده حرارة تصل درجة الغليان إحساس الإهانه الواصلنا كلنا فى الإجتماع..
وقفت أختنا وزميلتنا ودموعها فى عيونها "أنتو حتعملوا شنو؟؟ ومتين؟؟ راجين شنو؟؟ لمن يغتصبونا!!"
سكت الجميع.. حتى الكانوا يبينادوا لا لإضراب الطوارئ.. لحظة صمت أشعرتنا جميعاً بالذل الوصلنا له.
لما طبيبتين يمشوا للعنبر عشان يعملوا مرورهم المسائي يتعرضوا للتحرش الجنسي اللفظي من مريض ومرافقينه لثلاث مرات وتمشي احداهن تطلب الأمن تلقي معارضة من الممرض المناوب.. تمشى تفتح بلاغ يعاكسوها من الملازم لوكيل النيابة ويحاولوا يخلوها تتنازل..
لما تطالب ببلاغ تحرش أثناء تأدية عمل يقوم يتعمل بلاغ تحرش فى مكان عام.. نفهم شنو؟؟
لما يخلو سبيل المعتدين الثلاثة ويطلعوا من قسم الشرطه بركشة يدفع حسابها الشرطي.. نفهم شنو!!
لما يرجع المريض المعتدى المستشفى وتطرده الإدارة من المستشفى يجي راجع تاني بعربية الشرطه وهو يتبسم للأطباء الإشتكوهُ ويدخل يرقد فى غرفته.. نفهم شنو؟؟
لما فى النهايه يتم تحويله لمستشفى الشرطه.. نسأل روحنا الشرطه ديل الدكاترة داسو ليهم على ياتو طرف؟؟
كونه الشرطه مصنفه المريض لأسباب أمنيه " VIP" دى مامشكلتي كطبيب..
لما زميلتي دى تقيف تبكي وتقول حتعملو شنو.. هل مطالب أنا أعلق همومى على شماعة الإنسانيه وألبس كوتى وأدخل الطوارئ أشتغل!!
نواب مستشفى أم درمان.. متضامنون كامل التضامن مع زميلتنا وإضراب عام عن العمل.. عدا الحالات الحرجه..
...
أعتقد القبض على هذا المعتدى.. وان يأخذ القانون مجراه.. وإعتذار رسمى من رئاسة الشرطه عن الإهانه التى ألحقتها عناصرهم بالأطباء دا أقل حاجه ممكن يتقبل بيها..
ساره النور.. نائب باطنيه.. م. أمدرمان
ليست هناك تعليقات:
إرسال تعليق