السبت، 30 أبريل 2016

طلعنا الشارع و ما بنرجعْ


طلعنا الشارع و ما بنرجعْ
لحدي ندُك عرش الطُغيان
و برضو ننادي الناس أجمع
يمُرقوا معانا يعلّوا الشان
الخوف جُوانا يمين بِطلع
لما نقابل جُبن الكيزان
كُلْ واحد فينا حجارتو جمع
يشتت بيها قُوى البُهتان
صامدين و هُتافنا يزيد يصدَع
يغطي علي كل الأركان
دين الإسلام للرحمة شرَع
فيهُ الحرية في أسمى مكان
ما يهم لو حتى كمان نصرع
في دِمانا , فداءً للسودان
الموت الحق وهجوُ بيسطع
كيف الواحد يلقاهُ جبان
لو من رصاص أو من مُدفع
أو من تأثير غازات بُمبان
شُهدانا مكانهم فوق و أرفع
عند المولى في قُصور و جِنان
أعلنّا نضالنا و لن نركع
للذُل من تاني و لن نِنهان
لن نرضى بلدنا يصير مرتع
للصوص العسكر و الأخوان
---------------------------


د. عمر بادي
28 أبريل 2016

ليست هناك تعليقات:

إرسال تعليق